Ducias de familias acodiron onte ao edificio municipal das Palmeiras do Graxal, en Cambre, para protestar pola falta de limpeza no CEIP O Graxal. A chamada á manifestación da ANPA O Mencer trasladouse a todas as familias do centro fartas que ver como os seus nenos teñen que convivir coa suciedade día tras día.

Nin o contrato de emerxencia sanitaria anunciado onte mesmo polo Concello, nin a reunión mantida pola mañá, impediu que as familais levasen á denuncia á rúa.

”Necesitamos solucionar con urxencia o problema de insalubridade que hai nos colexios e outros centros públicos do concello”, leron nun manifesto. ”Tamén queremos esixir unha maior implicación do resto das administracións que ata agora se mantiveron á marxe”, apuntaron en relación á Deputación ou a Xunta.

Porque, lembraron “se trata dun problema de saúde pública que atinxe a Sanidade, e sabemos que podería acelerar o proceso se tivesen realizado inspeccións da situación. E é un problema da Inspección Educativa, que quedou á marxe e que puido estar moito, moito máis implicada”.

Tamén recoñeceron que “o bloqueo que sofre o concello é sabido, pero precisamos solucións inmediatas, e iso probablemente require menos expectación e máis acción, e iso é o que demandamos a todas e cada unha das organizacións que, en maior ou menor medida, poidan actuar. Que colaboren en busca de solucións XA. A política non debe ser un freo á procura dunha solución”.

”Grazas a todos os que asististes, porque deixastes claro que os veciños de Cambre, traballando en equipo, movemos montes”, rematou o manifesto.

Máis novas

As familias do Graxal mobilízanse mentres o Concello adxudica o contrato de emerxencia sanitaria

Decretan emerxencia sanitaria en Cambre para contratar de forma urxente a limpeza en colexios