A Xunta instou ao Goberno a implicar ás comunidades autónomas para que teñan unha “participación directa e activa” na xestión da Axencia Estatal de Supervisión da Intelixencia Artificial, que terá a súa sede na cidade da Coruña. Así o defendeu este venres o conselleiro de Faenda e Administración Pública, Miguel Corgos, no marco da Conferencia Sectorial de Transformación Dixital, que sentou ao Goberno central, co ministro José Luís Escrivá á cabeza, con representantes dos executivos autonómicos.
No encontro, segundo recolle un comunicado da Xunta, Corgos aliñouse coas autonomías que reclamaron ao Goberno que as implique no proceso de transformación dixital e manifestaron o seu malestar por “non ser consultadas” na elaboración da Estratexia de Intelixencia Artificial.
Corgos lembrou que Galicia “foi unha das tres primeiras” comunidades do Estado en elaborar a súa propia estratexia de intelixencia artificial como recomendan as directrices europeas e defendeu a “aposta” por avanzar na especialización tecnolóxica como unha “oportunidade” para cohesionar o territorio, achegar servizos a zonas rurais e xerar riqueza. Así mesmo, avanzou que a Xunta aprobará proximamente o proxecto de lei para o desenvolvemento da IA en Galicia, que se converterá “na primeira lexislación deste tipo que se adopte nunha rexión europea”.
