O presidente da Deputación da Coruña, Valentín González Formoso, ofreceu apoio da institución provincial para situar na antiga fábrica da Cros, situada na zona do Burgo de Culleredo, un Centro de Excelencia para a Competitividade en Economía Circular.
O presidente da Deputación visitou este luns as instalacións de CETIM Technological Centre, un do sete centros tecnolóxicos de referencia en Galicia, situado no parque empresarial de Alvedro, no municipio de Culleredo. Formoso estivo acompañado polo alcalde e deputado de Facenda e Avance Dixital, José Ramón Rioboo; e o director xeral do centro tecnolóxico, Toni Pons; entre outros.
Na súa visita, ofreceu o apoio da institución provincial para colaborar co Concello e o CETIM na localización das naves da antiga fábrica da Cros do Burgo dun Centro de Excelencia para a Competitividade da Economía Circular.
“O CETIM experimentou un importante crecemento nos últimos anos que fai que este espazo quede pequeno, pero hai encima da mesa a solución: a antiga Cros, que é unha vella demanda dos veciños”, dixo para destacar que esta solución “está encima da mesa” e aberta á participación de todas as administracións, desde o goberno do Estado á Xunta de Galicia”.
“É un proxecto liderado polo Concello de Culleredo, que conta co apoio da Deputación da Coruña para o seu financiamento e desenvolvemento”, lembrou o presidente, que explicou que a execución dese proxecto sería un exemplo de como as administracións achegan “facilidades a entidades e empresas que apostan pola innovación, a investigación e a tecnoloxía para seguir crecendo, dado o necesario papel que exercen na sociedade”.
Ademais, Formoso destacou que, con esta actuación, a Cros pode deixar de ser un problema estético para Culleredo e pasar a ser a localización dunha das entidades máis prospectivas e con máis futuro no ámbito da economía circular e da investigación científica.
Pola súa banda, José Ramón Rioboo apuntou que CETIM significa talento e todo ese talento pode estar concentrado nunhas naves emblemáticas á beira da ría do Burgo, que vén ser exemplo de biodiversidade e encontro co medio ambiente
“CETIM é economía circular e investigación. Por tanto, ten o necesario para que unha fundación poida estar situada nas naves da Cros, que representan esa transformación que tivemos na sociedade de industrias contaminantes a outras que apostan por unha diminución da pegada de carbono”, engadiu o alcalde, que recalcou que o goberno non renuncia a ese proxecto e considerou que “aínda existen posibilidades de que se poñan de acordo todas as administracións para conseguir un financiamento que xa había para facelo realidade”, finalizou.
Pola súa banda, o director xeral do centro tecnolóxico sinalou que, debido ao gran crecemento da actividade, necesitan seguir aumentando o equipamento científico e talento coa creación de emprego altamente cualificado, unha cuestión que lles é moi complicada co espazo do que dispoñen na actualidade.
“En CETIM queremos quedarnos en Culleredo porque apostamos por esta localidade e queremos seguir impulsando a economía circular na nosa rexión, situando a Galicia e a España á vangarda europea e internacional en sustentabilidade, a colaboración público-privada e o I+D+i; contribuíndo ao crecemento económico de Culleredo e converténdoo nun Polo de Economía Circular de atracción de talento de alta cualificación”, destacou.
O proxecto previsto para as antigas naves da Cros do Burgo, ademais do centro de I+D+i, prevé a construción de instalacións para actividades socioculturais municipais, un espazo de ?co-working? para empresas innovadoras e emprendedores no ámbito da sustentabilidade, salas de formación e divulgación, un auditorio e espazos exteriores de máis de 12.000 metros cadrados con zonas verdes axardinadas de esparexemento público.
