As traballadoras da escola infantil O Berce, no concello coruñés de Arteixo, concentráronse este luns para reclamar “o pagamento inmediato dos seus salarios e traballo efectivo”. Así o informou a CIG, que sostén que a dona da empresa Os Gosendes lles anunciou o pasado mes de xullo “a súa intención de pechar o centro”, pero, en lugar de liquidar as débedas salariais e rescindir os seus contratos, mandounas para a casa cun permiso retribuído dun mes que posteriormente estendeu ata setembro, a pesar de que as instalacións da escola xa están desmontadas.

A central sindical asegura que as seis traballadoras se atopan “nunha situación insostible”, xa que levan sen cobrar as nóminas desde abril, non teñen ocupación real porque xa non existe centro de traballo e tampouco poden acceder ao cobro da prestación por desemprego porque a propietaria non lles entregou a carta de despedimento. Segundo relataron as propias empregadas, os atrasos no pagamento dos salarios comezaron a finais de 2024, aínda que daquela a débeda non chegaba a superar os tres meses. A situación empeorou, segundo explicaron, a partir de novembro de 2025, cando se produciu a suspensión do pagamento dos soldos durante dous meses, ata derivar posteriormente no impago continuado dos salarios.