O salón internacional do cómic Viñetas desde o Atlántico 2024 inclúe na súa edición número XXVII propostas de música, entrevistas e gastronomía, nunha cita que se celebrará na Coruña desde o 12 ao 18 de agosto. Ademais, renderá homenaxe a Akira Toriyama (creador de ‘Dragon Ball’ ), engadirá a figura de ‘Gaspariño’ (personaxe pioneiro do autor galego de Xaquín Marín) e a presentación de ‘Black is Beltza II: Ainhoa’, de Fermín Muguruza.

Así o informaron durante a presentación deste evento a alcaldesa da Coruña, Inés Rey, e Manel Cráneo, quen se estrea como director artístico do festival. “Imos tentar chegar a todos os públicos”, explicou Cráneo. Farano “renovando un pouco algunhas fórmulas e respectando a esencia do festival”. “Imos seguir consentindo a autores e autoras convidadas, vai seguir sendo o punto forte do festival”, puntualizou. A rexedora, pola súa banda, fixo un “recoñecemento” a Miguelanxo Prado como impulsor deste evento, no que tamén participan a Deputación da Coruña e a Xunta, e apelou a “perpetuar e manter viva a esencia do que creou”.

PROGRAMA

O programa inclúe unha nova estrutura ao redor de seccións especializadas para diferentes públicos: Expo, Show, Rúa BD, Mini, Ñam!, Prol, Inclusivas e Escola. Acollerá tamén unha mostra de máis de 40 autores galegos, un total de 18 exposicións, máis de 100 sesións de firmas, a presenza dunha vintena de editores de toda España e máis de 30 actividades cun total de 36 expositores.

Doutra banda, ‘Toriyama en Galicia’ é o título da exposición colectiva que lle rende homenaxe ao autor de personaxes como Son Goku ou Arale e, por primeira vez, un personaxe de cómic dun autor galego, ‘Gaspariño’ de Xaquín Marín, súmase á colección de figuras que visten a cidade herculina. Ademais, Fermín Muguruza presentará, no Teatro Colón, a súa longametraxe ‘Black is Beltza II: Ainhoa’, secuela do seu éxito ‘Black is Beltza’, primeira incursión do artista no cinema de animación.