Anunciaba onte a Xunta un cambio nos servizos do transporte público de Oleiros e Sada tralas denuncias colleitadas pola veciñanza sobre a perda de numerosos buses. “De 44 servizos directos á semana a 14″, denunciaba unha plataforma cidadá que esta colleitando sinaturas en Cambre e Oleiros.
A Xunta aseguraba o luns que reforzará desde o vindeiro luns, 29 de xullo, sete servizos de autobús no eixo A Coruña-Oleiros-Sada en horarios de maior ocupación. Un reaxuste que para o Concello de Oleiros é un “insulto”, pois “en realidade se eliminan 46 servizos de autobús que existían en Oleiros antes do día 22 de xullo”. “Esta é unha decisión unilateral da Xunta que non conta co apoio do Concello de Oleiros por supoñer un recorte nos servizos de transporte para os cidadáns de Dexo, Serantes, Maianca, Dorneda, Liáns e Perillo – 29.366 persoas-“, critican nun comunicado o concello oleirense.
“Para resolver os graves problemas existentes no transporte público creados pola incompetencia da Xunta de Galicia, o Concello segue aberto a dialogar para que se reordenen horarios e liñas, sempre e cando se manteña, como mínimo, o número de servizos que había antes do 22 de xullo”, sinalan.
Pero lamentan que “os representantes autonómicos tarden máis dun mes en intentar resolver esta situación e desprecen desa maneira aos centos de cidadáns que levan sufrindo durante estas semanas retrasos, perdas de tempo, imposibilidade de acceder aos autobuses, falta de información, etc.”.
Avisan dende o Concello que “de non rectificar de inmediato nesta decisión, o Concello realizará diversas accións encamiñadas a denunciar esta indignante actuación da Xunta de Galicia. Non é posible mellorar o tráfico sen un servizo de transporte minimamente digno”.
Máis novas
Máis servizos de bus entre A Coruña, Oleiros e Sada nos horarios de maior ocupación
