O luns 5 de agosto, a cidade da Coruña volverá acoller unha nova edición do Festival Noroeste Estrella Galicia, un evento que abarca música e artes escénicas como pratos principais. Tal e como comunicou a organización do festival a través dunha nota de prensa, a 37ª edición pretende reforzar o seu liderado e converterse nun “evento cultural de referencia no noroeste peninsular”.
Nesa liña, o festival divídese en dúas seccións principais: ‘Noroestiño’ e ‘Contos ao Noroeste’. A primeira delas será a encargada de inaugurar a festa cunha narración oral e musical protagonizada polos intérpretes Vero Rilo e Luis Iglesias, que terá lugar o luns ás 19.00 horas na Praza de Vigo.
De forma paralela, o actor Avelino González será o encargado de estrear a sección de ‘Contos ao Noroeste’ cun espectáculo sobre historias de amor, que terá lugar ás 19.00 horas nos Xardíns de Méndez Núñez. Ambos os eventos son gratuítos e están dirixidos a todos os públicos.
PROGRAMACIÓN DO FESTIVAL
A música, elemento central da celebración, materialízase nunha serie de concertos de varios xéneros musicais que comezarán o mércores 7 e estenderanse ata o sábado 10. Entre as localizacións nas que se desenvolverán os espectáculos figuran espazos como o Campo da Leña, a Praza de Azcárraga e o Castelo de San Antón.
Fillas de Cassandra, Xoel López, Vetusta Morla e The Rapants son algúns dos nomes dos artistas e grupos que forman parte do cartel do festival, un evento no que todas as actuacións musicais son gratuítas. Así mesmo, os espectáculos de artes escénicas tamén se estenderán ata o día 10 e contan cunha variada programación que pode consultarse, do mesmo xeito que os concertos, na páxina oficial do festival.
