Dúas persoas foron trasladas por queimaduras tras un incendio nunha vivenda da rúa Mosteiro de Caaveiro, á altura do número 30, na Coruña.

Segundo informaron os Bombeiros da Coruña, o lume produciuse sobre as 13.55 horas deste domingo e varios particulares alertaron de que saía lume pola xanela.

Ao parecer, o incendio produciuse ao arder o aceite dunha tixola e un dos ocupantes da vivenda tentou apagalo con auga. Os Bombeiros avisaron de que iso “nunca se debe facer”.

Ata o punto desprazáronse tres dotacións dos Bombeiros, a Policía Local e persoal de Urxencias Sanitarias de Galicia-061 que trasladou aos feridos ao Hospital Universitario da Coruña (CHUAC).