O Concello de Oleiros procedeu á retirada de 59 carabelas portuguesas que apareceron este luns nas praias de Santa Cristina, Bastiagueiro e Espiñeiro. Segundo indica o Consistorio, “aínda que a situación pode cambiar, neste momento está colgada a bandeira amarela neste tres areais para que os bañistas extremen as precaucións”.
Tamén se está informando da situación a través da megafonía das praias “para lembrar a importancia de non tocar estas medusas que provocan fortes picaduras”. En caso de contacto, as persoas afectadas deben dirixirse ao posto de socorrismo.
As carabelas portuguesas chegaron a semana pasada a praias da cidade da Coruña, ao municipio coruñés de Carballo e a algunhas praias do norte da provincia de Lugo. De feito, a “gran cantidade” de exemplares desta especie atopadas na zona obrigaron a cancelar este domingo a LXXXIII Travesía a nado de San Amaro, na cidade herculina.
SEGUIMENTO NA CORUÑA
Pola súa banda, o Concello da Coruña informou que se está realizando un seguimento diario da chegada de medusas ás praias da cidade aínda que sitúa dentro de “a normalidade” nestas datas a presenza das mesmas.
Con todo, desde o consistorio lémbrase aos bañistas que deben estar atentos ás indicacións dos servizos de socorrismo que, tanto por megafonía como co izado de bandeiras, alertan de calquera posible risco. Tamén se lembra que non se debe tocar aos exemplares que aparezan na area e que o concello se encarga da súa retirada.
