A Audiencia Provincial da Coruña celebrará o martes, día 17, o xuízo contra un pai e un fillo acusados de estafa na xestión dos aforros dun matrimonio de Cambre, así como de falsidade en documento mercantil, segundo informa o Tribunal Superior de Xustiza de Galicia. De acordo co escrito de Fiscalía, ambos exerceron durante varios anos como axentes mediadores de seguros, traballando mesmo nunha entidade financeira durante varios anos.
Certo tempo despois, os acusados contactaron co matrimonio e comunicáronlles que deixaban a entidade bancaria para establecerse pola súa conta, constituíndo unha consultoría financeira en 2015, pedíndolles que continuasen confiando neles para a xestión dos seus aforros porque lles conseguirían unha alta rendibilidade.
O Ministerio Público sostén que “simulando cos anteriores que se preocupaban polo seu benestar e situación persoal” conseguiron que lles entregasen diversas cantidades de diñeiro “na crenza de que os acusados ían investilas en produtos fiables e rendibles”.
Un deles entregoulles aos acusados a cantidade de 24.515 euros e outro a de 18.243 euros, aínda que Fiscalía sinala que os acusados “nunca tiveron intención” de investilos en produtos financeiros.
Por un delito continuado de estafa, coa atenuante de reparación dano, e outro delito de falsidade en documento mercantil, pide penas que suman un total de seis anos e nove meses de prisión.
