A circulación na AG-55 quedou restablecida tras permanecer cortada durante a tarde deste martes á altura de Arteixo debido ao envorco dun camión no quilómetro 12 desta vía.

Tal e como informou o 112 Galicia, foron varios os particulares que contactaron coa central de emerxencias para alertar deste sinistro sobre as 12.30 horas.

En concreto, o suceso ocorreu á altura do quilómetro 12 desta vía e, segundo a información recollida polos operadores do 112, un camión remolque envorcara neste punto, o que provocara que a estrada quedase cortada na súa totalidade.

Así, o Centro Integrado de Atención ás Emerxencias de Galicia (CIAE-112) solicitou a intervención do Servizo de Urxencias Sanitarias de Galicia-061, que cando chegaron ao lugar sinalaron que o camioneiro se atopaba atrapado no interior, xa que o vehículo estaba totalmente ladeado e o condutor non era capaz de abrir as portas.

A continuación, deuse aviso aos Bombeiros de Arteixo, que tiveron que empregar material de excarceración para liberar ao condutor polo parabrisas dianteiro do vehículo.

Debido a este accidente, informou a Dirección Xeral de Tráfico (DXT), a AG-55 estivo cortada durante a tarde deste martes desde o quilómetro 8, en Vilarrodís, ao quilómetro 11, en Loureda.