1.000 novas vivendas supoñen un incremento poboacional importante. Por iso, a veciñanza do Castrillón, e tamén os de Oza, Os Castros ou a Gaiteira, está preocupada polo impacto que vai ter a nova urbanización proxectada e anunciada a comezos de agosto polo Concello.
A semana pasada houbo unha reunión entre a Asociación de Veciños do Castrillón e outras entidades da zona, cos técnicos dun proxecto que aínda está en estado embrionario.
Tras escoitar as primeiras ideas e ver os primeiros bosquexos do proxecto, esperan que o proxecto se presente no DOG para preparar alegacións.
”Vémolo con preocupación”, recoñece o presidente da Asociación de Veciños O Castrillón, Ramiro Otero, e non só polas 3 torres de 17 alturas (un edil lles chegou a dicir, como se fose “un orgullo”, que ían ter unha das torres máis altas da cidade, deixando clara a idea de cidade que teñen no goberno socialista) e os outros 15 edificións de 8 pisos.
A preocupación maior vai por todo o que implicará o incrememento poboacional, facendo que o barrio sume 2.500 novos veciñ@s aproximadamente. “Como vai afectar isto aos servizos dun barrio cunha oreografía complicada como a nosa? Como se vai afrontar á accesibilidade? Como vai afectar aos espazos de lecer, os servizos de ensino, centro de saúde…”, pregúntanse Ramiro. “Como vai influir o incremento no tráfico ou nos garaxes se en realidade queremos unha zona peonil?”.
Cousas coma estas serán as que analice pormenorizadamente a veciñanza ante a nova urbanización.
Máis novas urbanísticas
O bronco pleno rexeita convenio co fondo de investimento para urbanizar as Xubias
