Fixérono, e xa é a segunda vez que acadan este importante trofeo internacional. O equipo feminino de fútbol gaélico da Coruña, Fillas de Breogán, alzouse este pasado sábado co trofeo do Torneo Paneuropeo de fútbol gaélico que se celebrou en Lyon (Francia). Ë a segunda vez que as herculinas se alzan con este prestixioso título nos seus 14 anos de historia, tralo título acado en Viena en 2019.

Cómpre lembrar que Torneo Paneuropeo é o campionato de clubs de fútbol gaélico máis importante a nivel europeo. Fillas de Breogán participaron na categoría Intermediate, que sería equivalente á Europa League no fútbol.

O formato da competición consistía nunha fase de grupos na que os dous primeiros equipos clasificados disputaban unha semifinal e os vencedores destas semifinais cualificaban para a final.

Na categoría Intermediate participaban oito equipos divididos en dous grupos, estando as coruñesas emparelladas con Brest, Nantes e Clermont, todos eles do país anfitrión. Tras impoñerse folgadamente a Brest (17-4) e unha axustada derrota ante Nantes (10-13), acadaron a segunda posición do grupo logo de vencer a Clermont (11-4). Fillas de Breogán derrotaron na semifinal a Copenhague (10-8), habitual finalista deste torneo, e volvéronse enfrontar con Nantes na final. As coruñesas desta vez foron quen de impoñerse ás francesas (10-8), habituais gañadoras deste torneo nas súas últimas edicións.

Máis novas

Vari@s xogador@s do Fill@s de Breogán, ao Mundial de Fútbol Gaélico