O Tribunal Superior de Xustiza de Galicia declarou nulo o despedimento dunha traballadora de Pizzarías Cambalache “por entender que a empresa de restauración vulnerou a súa garantía de indemnidade“, informa a central sindical CIG.

A resolución do alto tribunal galego, engade, deixa sen efecto unha sentenza previa do Xulgado do Social pola que se declaraba este despedimento como improcedente. Agora, tras o suplicatorio da CIG en nome da traballadora, o TSXG resolve “corrixindo a inadmisión anterior e estima integramente a demanda, recoñecendo a nulidade do despedimento, ordenando a inmediata readmisión da traballadora con abono dos salarios de tramitación e impondo, ademais, o pago dunha indemnización por danos morais”.

A traballadora, cociñeira no restaurante, foi despedida, segundo a central sindical, “poucos días despois de solicitar o goce dos días de asuntos propios aos que tiña dereito” tras remitir previamente unha solicitude por correo, “non contestada”. “Poucos días despois sería despedida alegando non superación do período de proba, a pesar de que este período xa fora superado”, apostila.