Emotiva inauguración a que se viviu onte da mostra ‘Hematocrítico Ilustrado’ no salón municipal de exposicións do Palexco. Unha exposición que se poderá visitar ata o vindeiro 6 de xaneiro de 2025, impulsada polo Concello en colaboración co Hemato Festi, que serve para render homenaxe a Miguel López, mestre e divulgador coruñés coñecido nas redes sociais como ‘El Hematocrítico’, falecido hai case un ano.

No acto destacaron ese sorriso que era capaz de sacar a toda a comunidade global tanto cos seus libros como cos seus chíos na rede. A escritora e parella do homenaxeado Ledicia Costas, fixo de anfitriona, xunto coa comisaria Matilde Rodríguez.

A mostrea que recolle parte da mirada crítica e positiva da realidade que difundía Miguel López nas redes sociais, contará cun espazo didáctico ideado para fomentar a creatividade das crianzas.

Ademais, fai un percorrido creativo de ilustracións no que compañeiras e compañeiros de profesión de Miguel achegan as súas ideas en conexión coa súa obra. Son Albert Monteys, Alberto Vázquez, Cintia Hierro, Eugenio Ábalos, Laura Árbol, Mar Villar, Martín Romero, Olga Capdevila e Paco Roca.

A maiores, a exposición contará cunha Biblioteca Hemato, un espazo de lecer cunha selección específica de contos e obras do autor.