Segue a veciñanza do Castrillón moi preocupada pola nova urbanización que vén de aprobar o Concello, acorde coa súa política urbanística. Un proxecto, o API QA-28, que creará máis de 1.000 novas vivendas coa construción de 3 torres de 17 alturas e outros 15 edificios de 8 pisos.
De aquí a uns anos, o barrio contará con 2.500 novos veciñ@s a pesar da carencia de equipamentos, como xa denunciou tamén o presidente da AVV. O Castrillón Ramiro Otero.
Neste caso é a A.V.V. Castrillón-Urbanización Soto IAR a que vén de presentar unha batería de alegacións ao convenio urbanístico API Q28 “Parque de Oza”. Ata 31 folios entre os que destacan varios puntos chave.
A entidade pide reducir a edificabilidade. “Non se explica o aumento do aproveitamento en 9.847m2 no PXOM de 2013 nin a incorporación ao ámbito de chan ao lado da Ronda de Outeiro”, pedindo que a edificabilidade non supere o límite legal que se fixa en 1,5 m2/m2.
Piden ademais que a porcentaxe de Vivenda Oficial Protexida sexa do 30% non 10% como está anunciado (sendo o mínimo estipulado pola lei de 2023 o 20%).
Piden tamén que convenio inclúa un equipamento preto da última sede do Concello de Oza, edificio que se vai rehabilitar e respectar.
Moita preocupación hai no barrio ante o aumento de tráfico, por iso piden o compromiso de facer un estudo de tráfico global, tendo en conta que o proxecto de “super manzana” provocará que a intesidade do tráfico aumente considerablemente na parte externa da mesma.
Entre outras cousas esixen tamén elementos electromecánicos de tránsito peonil para unir a urbanización co Parque de Oza.
E ademais, lembran que existe un xacemento arqueolóxico preto da Avenida da Concordia, polo que solicitan a realización de sondeos deste xacemento da Idade de Bronce.
Máis novas
A veciñanza do Castrillón amosa as súas inquedanzas ante a creación de 1.000 novas vivendas
