Esta mesma tarde, a partir das 20:00h, subirán ao escenario no Centro Ágora, nun novo concerto, de balde, do Festival Festigual. Pero tamén as poderemos escoitar na plataforma Agalega, porque as Fillas de Cassandra participan no último episodio da segunda temporada da serie Pringadas.

Escrita e dirixida por Belén Puime (A Coruña, 1998), este fenómeno dixital fala cara a cara á mocidade, tratando temas habitualmente tabús nas canles ordinarias. Así, entre os capítulos, a serie reflexiona a sexualidade, as relacións, as infeccións de transmisión sexual ou os conflitos co entorno.

Nesta nova e última entrega, a serie afonda na trama de Catu, quen debe navegar o mundo das relacións de poder e o machismo no marco dun certame de literatura. Xunto a novas adicións ao reparto como Miguel Canalejo (A Coruña, 1991) ou Fernando Rivas (Redondela, 1969), a serie trata a vida de tres universitarias da capital galega, interpretadas por Carmela Vázquez (A Coruña, 2003); Catu, interpretada por Lara Álvarez (Redondela, 1999); e a Antía, interpetada por Camila Ferreyra (Buenos Aires, 2000).

Acollida

Pringadas comezaba a súa andaina no festival de contido dixital Carballo Interplay, onde consigue o Premio a proxecto e posteriormente o premio Mellor Serie Galega. Foi finalista dos premios Mestre Mateo do Audiovisual e pasou por festivais de renome nacional como o Serielizados.
Tamén foi proxectada en eventos conducidos pola directora, chegando a espazos coma o Teatro Colón da Coruña e o Palacio Cibeles de Madrid. Así, a serie chegou a ser a primeira ficción seriada en galego da plataforma Filmin, e a primeira serie en galego dirixida por unha muller que logra proxectarse nunha OTT.
Nesta volta do proxecto ás pantallas, tivo a oportunidade de celebrar un evento que encheu a Igrexa da Universidade da USC e que contou cun photocall e unha presentación por parte a directora Belén Puime xunto con Uxía Vázquez.

Máis novas

A directora herculina Alicia Úbeda debuta en ficción con “Ratiña”