O espazo A Revolteira nacía aló por marzo na Falperra (no nº13), como un lugar vivo, activo, como unha “alternativa colectiva e comunitaria fronte un sistema que exclúe ás maiorías e ameaza a supervivencia dos nosos barrios, da nosa cidade, do noso país e do noso planeta”.
Ten realizado nestes meses presentacións de libros, obras de teatro, charlas, merendas, obradoiros, ensaios, clases… De feito, durante cara martes e mércores se desenvolven no centro clases de baile, ensaios de charanga, un club de videoxogos, obradoiros de teatro ou sesións de pensamento crítico.
A seguinte actividade terá lugar este sábado 30 de novembro, e reflexionará sobre o problema do acceso á vivenda na cidade e nos barrios. Abrirá a xornada, a partir das 18:00h, Javi Quiroga, que debullará a iniciativa #Ninmedionormal, que desenvolve a través do seu proxecto @Onovonormal e sobre a que xa temos falado.
De seguido, terá lugar a presentación do “Sindicato de barrio de Falperra – Os Mallos”. “Unha comunidade de loita coa que enfrontar colectivamente as dinámicas de expulsión e empobrecemento que padecemos as veciñas do barrio”. Unha comunidade autoorganizada para loitar contra o proceso de destrución social provocada polo rendismo.
Para rematar poderase cear comida vegana e bailar da man de DJ Tochi.
Máis novas
#Ninmedionormal, a campaña de @o.novo.normal.coruna pola Emerxencia Inmobiliaria
