Esta mañá de luns o BNG vén de presentar a campaña Vivir na Coruña… é imposíbel, que afonda sobre as dificultades para acceder á vivenda na nosa cidade.
A campaña ilústrana dous cartaces, xa pendurados nas rúas, con imaxes aéreas da Coruña, un deles sementado de etiquetas indicativas dos altos prezos que alcanzan os alugueres das casas, acompañadas dos símbolos dos pisos baleiros e das vivendas de uso turísticos.
“Todos sabemos de que estamos a falar. Os prezos das vivendas están a alcanzar niveis que son imposíbeis de asumir para persoas con salarios normais”, denuncia Ignacio Siota, quen a seguir esclarece o alcance do lema escollido polo BNG para esta campaña: “Vivir na Coruña claro que continúa sendo bonito, mais os prezos da vivenda estano a facer imposíbel”.
Un problema que afecta á mocidade pero tamén a o resto de sectores poboacionais. “Afecta tamén unha muller de 45 anos que se queira separar e que co seu salario non pode pagar determinados alugueres. Afecta a xente traballadora que se ve obrigada a compartir piso…”, exemplificou Veira.
Para a concelleira nacionalista, “o problema non se resolve desde a lóxica do mercado, desde o funcionamento puro e duro da lóxica da oferta e da demanda“. “Estámolo vendo con novas promocións que poñen á venda pisos a 300 mil euros, fóra do alcance das maiorías sociais”, critica.
“Cómpren, por tanto, políticas públicas, sendo que precisamente a ausencia desas políticas públicas de vivenda está na orixe das enormes dificultades que teñen as persoas para satisfacer o seu dereito a unha morada digna”.
Vivenda pública
“O Estado español está á cola da UE na construción de vivendas públicas. Pois ben, Galiza infelizmente está á cola do Estado español nese capítulo”, remarca.
E instan tamén ao Goberno Local a intensificar a súa presión política para a Xunta declarar A Coruña como zona tensionada –“non abonda con lle enviar unha carta á conselleira-, reforzar a Empresa Municipal de Vivenda –“para que realmente o sexa”, darlle pulo ao servizo de asesoramento aos inquilinos -creado a instancias do BNG-, aumentar o parque municipal de vivendas e impulsar a regulación das vivendas de uso turístico.
A nivel estatal pude a cesión gratuíta aos concellos dos inmóbeis da Sareb e “a posta ao servizo da sociedade dos terreos do Ministerio de Defensa” que ten que deixar de ser Defensa S.A..
Máis novas de vivenda
#Ninmedionormal, a campaña de @o.novo.normal.coruna pola Emerxencia Inmobiliaria
3 de cada 4 vivendas que se ofertan na Coruña xa son de uso turístico
O estudantado universitario convoca unha folga polo dereito a unha vivenda digna
