O BNG anunciou o rexistro de novas iniciativas no Congreso para instar o Goberno central a negociar co Concello da Coruña a rehabilitación do antigo cárcere e a súa cesión gratuíta.

O deputado do BNG no Congreso, Néstor Rego, instou ao Ministerio de Interior a que renuncie a interpor recurso ante a sentenza do Xulgado de primeira instancia número 5 da Coruña que declarou nulo o convenio asinado entre Concello e Goberno.

A sentenza, lembrou o BNG, declara nulo o convenio de 2005, entre Concello e Goberno, e indica que as administracións “non podían” acordar o intercambio de parcelas xa que “non é posible” a permuta de bens de dominio público, só de bens patrimoniais.

Agora, o BNG espera que o Ministerio de Interior, no concreto a Seipse, “desistan no seu empeño de asfixiar” ao Concello coa reclamación de “cantidades exorbitantes” cando o convenio de 2005 xa foi anulado.

“A vía máis acertada, neste momento, é a negociación entre Concello e Ministerio para poder sacar adiante a recuperación e rehabilitación do inmoble do antigo cárcere e a súa posterior cesión gratuíta ao Concello”, indicou Rego.