Emotiva exposición a que se estreaba onte na Fundación Luís Seoane. “Recuérdame” recolle o resultado dun ano de encontros entre a cativada da Escola Infantil Municipal Luis Seoane e as persoas usuarias Residencia para Maiores Torrente Ballester, no marco do programa homónimo entre ambos centros.

Van xa moitos anos que os centros de ensino que comparten a zona do Monte Vixía (que segue esperando polo prometido parque que as una), no corazón de Monte Alto, realizan experiencias interxeracionais, con visitas polo Entroido, polo magosto, ou por Nadal, na que as crianzas amenizan coas súas actuacións a vida dunhas persoas maiores que tamén comparten as súas experiencias de vida e agarimo.

“Recuérdame” nacía no curso 2022-2023, coa intención de deixar pegada dese proceso de unión entre xeracións a través das emocións, a memoria e a convivencia con actividades mensuais conxuntas como obradoiros de plástica, música, lectura, psicomotricidade e excursións. O obxectivo é estimular a aprendizaxe e a creatividade ademais de fortalecer a relación entre xeracións, ademais da creación de vínculos emocionais entre pequenos e maiores.

Como resultado, sae esta exposición de fotografías realizadas por Antía García, e nunha exposición cuio montaxe foi de María del Carmen Amarelo, na que os protagonistas son un total de 13 nenas e nenos de 3 anos, acompañados das súas familias; o persoal da Escola Infantil Municipal Luis Seoane, composto por 4 profesionais educativos e 3 membros do equipo directivo; e 11 residentes da Residencia Torrente Ballester, acompañados pola traballadora social.