Un dos pulmóns máis importantes para o barrio de Monte Alto segue agochado no caixón. Malia levar varios anos na axenda municipal, e mesmo contar unha partida orzamentaria para este 2024 de 1,2 millóns de euros, aínda non hai movemento.
Dende que as ANPAS o presentaran nos Orzamentos participativos, e o goberno municipal como propio o proxecto e encargandollo a un grupo de investigación da UdC, o barrio agarda por esta necesaria infraestrutura de servizos. Un Parque, prometido dende 2020, que estaría situado no monte do Vixía, no cumio de Monte Alto, e que permitiría unir dous CEIP, dúas Escoliñas Infantís e un centro de maiores.
Ante a parálise do proxecto, o BNG, que puxera este proxecto como parte do acordo de investidura, presentou unha moción para preguntar pola execución do Parque no vindeiro pleno deste xoves 4 de xullo.
A concelleira Avia Veira reuníase a semana pasada con representantes das ANPAS do CEIP Torre de Hércules, CEIP Curros Enríquez e CEIP Víctor López Seoane (non puido asistir pero tamén forma parte deste grupo veciñal a ANPA do CEIP Zalaeta), para escoitar as demandas das familias, fartas de esperar por un proxecto tan necesario.
A nosa concelleira @Avia_Veira mantivo esta tarde un encontro con representantes das ANPAS dos CEIP Torre de Hércules, Víctor López Seoane @AnpaFaro e Curros Enríquez @ANPACurros.
Trasládannos a súa inquietude ante a falta de avances na materialización do Parque do Vixía.
(1). pic.twitter.com/crpJ7Z0s0H
— BNG A Coruña (@BNGACorunha) June 26, 2024
O proxecto sinala que o parque contaría con 16.000 metros cadrados, dos cales 6000 xa estarían libres e de titularidade municipal e os outros 10.000 son propiedade do Arcebispado, da Xunta de Galiza e ao Concello e estarían ocupados por colexios. É precisamente esa pista, situada entre o CEIP Torre de Hércules e a Igrexa de San Xosé, un dos puntos que provocou a división en dúas fases do proxecto, deixando as eternas negociacións co arzebispado para máis adiante.
Máis novas
As obras dos barrios nas que o Concello investirá 93 millóns de euros
Parque Ciudad “Monte Martelo”, un parque que cambia unha cidade
