Este venres a Coruña xógase moito na reunión da Comisión da reforma fachada marítima da Coruña. Onte dabamos as primeiras pinceladas do documento base que probablemente se vai aprobar, e posteriormente licitar, para realizar o proxecto desta obra que vai cambiar a fisionomía e estrutura da cidade.
Unha das Plataformas máis activas neste proceso, Defensa do Común, considera necesario facer as seguintes precisións para coñecemento público tras analizar as primeiras valoracións que pode facer a través do que sae na prensa sobre o documento-base da reforma portuaria. A entidade xa se preguntaba hai meses se o protocolo garantizaba a titularidade pública dos terreos, e tras ver as primeiras DdC critica que “a proposta omite, conscente ou inconscentemente, tres demandas cidadáns e asumidas pola propia corporación municipal, isto é, titularidade pública dos terreos, ente público de xestión e condonación da débeda con Portos do Estado”. “Pola contra, o esceario previsto é o da desafectación e privatización en San Diego, e non só con destino a uso residencial”, sinalan.
Así, a Plataforma na obriga de “alertar á opinión pública de que a hipotética consumación do documento coñecido, suporía, de facto, unha reducción moi significativa do dominio público e de usos portuarios, con repercusións moi negativas para actividade portuaria, pesqueira e de usos complementarios e co agravante de que a Autoridade Portuaria aínda non ten definido o seu novo plan estratéxico para os vindeiros anos”.
Participación pública e transparencia
A entidade tamén “censura o que estima como falla de trasparencia e participación real da cidadanía, na medida en que o que agora estase a publicitar (redactado pola entidade externa Ineco) vai determinar todo o proceso posterior, fundamentalmente o futuro concurso e a ordenación urbanística e de usos dos peiraos. Un documento, redactado por Ineco, que tan só recolle unha parte das demandas cidadáns e que mantén como invariábel a privatización especulativa de parte dos terreos”.
Concurso restrinxido
A xuizo de DdC “resulta inpresentábel e inxustificábel a creación dun concurso restrinxido para o deseño do Plan Director. O concurso de proxectos debe ser aberto. Non hai razóns que amparen limitar, cunha preselección a dedo, a cinco candidaturas. Un procedemento restrinxido é o contrario á idea de participación que tanto vense pregoado até o de agora”.
Mobilidade vs rendibilidade
Defensa do Comín sinala que “as propostas de mobilidade, aínda que haia que saudar o feito de que contemplan varias das demandas cidadáns, as mesmas non poden nen deben quedar condicionadas coa estratexia de obtención de plusvalías por parte de Adif cos terreos da actual estación”.
Máis novas
Garante o protocolo da Fachada Marítima a titularidade pública do terreos portuarios de San Diego?
Análise: Que foi do interese xeral na reordenación urbanística da fachada litoral nas Xubias?
As 10 promocións urbanísticas formuladas na Coruña prevén a construción de 18.000 novas vivendas
