Non desisten os problemas no Conservatorio Profesional de Música do Concello de Culleredo. Despois das protestas de 2023 pola falta de profesorado, desta volta a ANPA O Burgo volve á palestra pública para denunciar as graves carencias do edificio.
As familias denuncian que o centro está sen calefacción dende mediados de decembro, sumando esta situación á falta de mantemento “dende fai anos”, a pesar das peticións das familias.
”As fugas de auga son constantes e non se poden paliar coa colocación estratéxica de cubos e cartóns polos corredores e nas aulas, o que implica un risco elevado de escorregamento e caídas ao mesmo nivel. Porque o tellado acumula auga co perigo de desprendemento dos paneles superiores do teito, o que implica a posibilidade de que algún elemento caiga sobre algunha persoa”, denuncian.
Alertan das humidades e o mofo que hai por todo o edificio e das fendas que van aparecendo.
Por iso pide ao Concello que realice actuacións canto antes por “seguridade”, “saúde”, e “dignidade”. “Os/as nosos/as fillos e fillas merecen ter unhas condicións dignas e saudables durante a realización dos seus estudos artísticos e musicais”. “Por unhas ensinanzas artíricas de calidade!”.
O BNG pide á Xunta que asuma a xestión do Conservatorio
Paralelamente, o BNG entende que o Conservatorio é “competencia da Xunta”, por iso presentará unha reclamación no Parlamento apoiada por máis de 400 sinaturas, pedindo que” a Xunta asuma a xestión e o custo do conservatorio municipal de Culleredo”, e que mentres planifica a asunción das súas competencias, que “convoque axudas para que os Concellos poidan cubrir os custos da xestión”.
A parlamentaria nacionalista declarou que “os Conservatorios de música municipais representan na actualidade unha carga económica importante para os Concellos que os asumen e ademais supoñen un problema para a súa xestión e unha discriminación para o alumnado e o profesorado, ao non contar cos mesmos recursos que os Conservatorios que xestiona a Xunta”.
