Presentouse onte no Teatro Colón a terceira edición do festival cinematográfico Norte Cinema Diverso, que se celebrará do xoves 20 ao sábado 22 de febreiro no propio teatro herculino.
O primeiro festival de cine LGTBIQ+ de Galicia volver ser unha plataforma para darlle visibilidade a colectivos menos favorecidos e a loitas sociais xustas, unha “ferramenta de transformación, compromiso e inclusión”, como sinalou o edil Gonzalo Castro.
Así, un día despois do 19 de febreiro, Día contra a LGTBIfobia no deporte (que conmemora á valentía de Justin Fashanu, primeiro xogador de fútbol de 1ª División en activo que se declarou publicamente gai), o fesstival arrinca coa curta española ‘Campeones’, que denuncia o silencio e ocultación dos homosexuais no fútbol masculino. Lembra que as instalacións deportivas e os campos de fútbol son un dos espazos nos que se producen máis delitos de odio relacionados coa LGTBIfobia. O deporte segue a ser un territorio hostil para o colectivo.
View this post on Instagram
Programa
En total serán tres longametraxes e catorce curtametraxes, procedentes de España, Polonia, México, Francia, Portugal, Argentina, Ecuador e Galicia, representada con dúas obras.
Un xurado composto por cineastas e xornalistas elixirán a curta gañadora do premio Trini Falcés. Deste xeito, Norte Cinema Diverso reivindica o legado desta muller trans coruñesa que encabezou en 1977 a primeira manifestación do Orgullo en España, celebrada en Barcelona.
Fóra de concurso, proxectarase a curtametraxe ‘Memoria LGTBIQ+’, realizada pola asociación Palestra e producida polo Concello da Coruña.
Obradoiro
Outra ferramenta de visibilización e de búsqueda de audiencias máis amplas e comprometidas é o obradoiro de cine con móbil. Este proxecto comezou en novembro e estes días están a rematar a montaxe da curtametraxe, que se poderá ver no Teatro Colón na xornada do sábado. A curta titúlase ‘Ela e eu’ e está baseada nunha obra de teatro do mesmo nome, realizada por escolares do colexio Andaina, e que denuncia o acoso que sofre unha rapaza da que se sospeita que é lesbiana. Máis de 30 cativos e cativas participaron na elaboración da curtametraxe.
NDC Educa e expansión ata Santa Comba
Coa idea de deslocalizarse e chegar a outros públicos fóra da capital, o festival xa ten levado, a través do proxecto NCD Educa, sesións de proxección e debate aos institutos de Oleiros, Arteixo e Cambre.
Desta volta abre un pouco máis as fronteiras, e celebrará o sábado 8 de febreiro unha xornada de cine e debate en Santa Comba, que incluirá a proxección da película ‘Te estoy amando locamente’ e un coloquio posterior coa participación dos codirectores do certame, Fernando Cayazzo e Fito Ferreiro.
