A conselleira de Medio Ambiente e Cambio Climático, Anxos Vázquez, advertiu ao Concello da Coruña de sancións se non instala o quinto colector.

“A lei é clara, non nos vai a quedar outra máis que facer os procesos sancionadores correspondentes”, aseverou, a preguntas dos xornalistas, con motivo da súa participación na presentación do II Plan Rexional Integrado de Enerxía e Clima, tendo en conta que a Lei Europea aprobada en 2008, obrigaba a todos os Concellos de máis de 5.000 habitantes a instalar a quinta fracción antes de 2023.

“O único que me consta é que tivemos reunións co Concello en 2023, chegamos a un acordo cordial para que fosen avanzando e cumprir coa normativa vixente, pero, a día de hoxe, o incumprimento é total”.

Así o expuxo a conselleira, que remarcou que o concello herculino “non está adherido para a recollida selectiva de plástico e de bricks, non hai o colector para recollelo”.

“Non nos vai a quedar outra máis que facer os procesos sancionadores correspondentes”, sinalou para incidir en que por parte da Xunta deuse “tempo suficiente”. “Estamos en febreiro e continuamos na mesma situación”, apostilou.