InicioSUCESOSCae unha banda de estafadores da Laracha que se aproveitaba de xente...

Cae unha banda de estafadores da Laracha que se aproveitaba de xente desempregada

Publicada o

Por editor

A Garda Civil de Milladoiro-Ames, no marco da Operación SAFAT, detivo a dúas persoas e investigado a outro tres por supostos delitos de estafa, usurpación de identidade, falsidade documental e branqueo de capitais. O grupo utilizaba documentación persoal que obtiñan de ofrecer falsas ofertas de traballo para abrir contas bancarias, cartóns de crédito e contratar préstamos.

Segundo informa a Garda Civil nun comunicado, a operación desenvolveuse baixo a dirección do Xulgado de Instrución Nº 2 de Santiago de Compostela e permitiu esclarecer un total de 62 delitos, con vítimas en Galicia e o País Vasco.

A investigación iniciouse no ano 2022, cando unha veciña de Teo denunciou a apertura fraudulenta dunha conta bancaria ao seu nome. Tras analizar a documentación, os axentes comprobaron que se utilizou unha fotografía do seu DNI sen o seu consentimento para formalizar a operación.

A medida que avanzaban as pescudas, detectouse que os fondos obtidos de forma ilícita transferíanse a outras contas bancarias tamén abertas fraudulentamente mediante a usurpación de identidades. Cando as vítimas foron informadas da existencia destas contas, interpuxeron as correspondentes denuncias por usurpación de identidade.

DOUS MÉTODOS DE ESTAFA

Explican que o grupo criminal utilizaba principalmente dous métodos delituosos para obter beneficios económicos. Por unha banda, a apertura fraudulenta de contas bancarias, utilizadas para a contratación de cartóns de crédito coas que realizaban compras e retiraban diñeiro en efectivo; e por outra, solicitude de préstamos persoais a nome das vítimas, para o que falsificaban documentación, como nóminas e certificados de titularidade de contas bancarias. Nalgúns casos, os préstamos alcanzaban importes de ata 29.000 euros.

Para obter a documentación persoal dos afectados, a principal investigada ofrecía falsas ofertas de emprego, dirixidas a mozos da súa contorna próxima, amizades e familiares. Este engano permitíalle acceder aos seus documentos de identidade, que posteriormente eran utilizados para abrir contas, solicitar créditos e dar de alta liñas telefónicas empregadas na comisión dos delitos.

Como parte da investigación, levou a cabo unha entrada e rexistro no domicilio dos detidos en Laracha, onde se acharon documentación falsificada e cartóns SIM empregadas nas fraudes. Ata o momento, identificáronse un total de 62 vítimas, e constatouse que o beneficio obtido polos investigados supera os 350.000 euros. Aínda que a maioría dos afectados residen nas comarcas de Santiago de Compostela e Bergantiños, tamén se detectaron prexudicados en Pontevedra e o País Vasco.

ÚLTIMAS

Folga nos autobuses da Coruña: os traballadores denuncian unha carga laboral excesiva e prodúcense danos en dous vehículos

O persoal da Compañía de Tranvías da Coruña, empresa adxudicataria do servizo de autobuses...

“Garabato”, da herculina Alicia Úbeda, a única curta galega seleccionada no ZINEBI 68

Segue asentándose Brava no panorama audiovisual galego. Como tamén o fai a directora Alicia...

A Xunta de Persoal solicita un calendario real, financiamento e solucións ante a demora nas obras do novo CHUAC

A Xunta de Persoal da Área sanitaria da Coruña e Cee achegouse esta mañá...

O TSXG avala o despedimento dun líder sindical do lixo da Coruña por instar a boicotear o servizo durante a folga

A Sala do Social do Tribunal Superior de Xustiza de Galicia (TSXG) confirmou como...

DEIXAR UN COMENTARIO

Please enter your comment!
Please enter your name here