O Concello da Coruña pechou o proceso para solicitar a declaración de zona residencial tensionada na cidade, segundo informa tras a reunión da mesa sectorial da vivenda. A mesma, presidida polo concelleiro de Urbanismo, Rehabilitación e Vivenda, Francisco Díaz Gallego, concibiuse para acordar o novo marco normativo para regular as vivendas turísticas e, ademais, avanzar na solicitude á Xunta da declaración de zona residencial tensionada.
O encontro, celebrado este mércores no Palacio Municipal de María Pita, supuxo o último trámite do proceso participativo previo á presentación da petición. Nos próximos días, esta será aprobada en Xunta de Goberno Local para a súa remisión á Xunta. Esta medida, expuxo Díaz Galego, “é fundamental para contribuír a equilibrar a situación actual do mercado da vivenda na cidade”, con escaseza no referente á oferta de inmobles en réxime de aluguer e custos moi elevados, “o que dificulta o acceso a un ben de primeira necesidade que, ademais, está recoñecido como un dereito constitucional”.
Neste sentido, o concelleiro lembrou que o Concello encargou meses atrás un informe técnico para certificar se, efectivamente, A Coruña cumpría cos requisitos necesarios para a declaración de zona residencial tensionada, como se confirmou en base aos datos recolleitos por distritos e seccións censais en toda a cidade. “A solicitude incluirá, de feito, o informe por distritos que expón claramente a importancia de adoptar esta medida para conter os prezos e garantir o acceso da cidadanía á vivenda”, recalcou o concelleiro.
