A apenas 4 días do remate do prazo para a presentación de alegacións, e despois de varias xornadas abertas de baixa participación, e despois das propostas do BNG, é o Movemento Sumar Galicia o que presenta as súa liñas argumentais diante das Bases Estratéxicas do proxecto Coruña Marítima.
Sumar reivindica “a orientación social do proxecto”, destacando “a oportunidade que se presenta na cidade para o fomento do benestar social e a construción da cidade arredor da xustiza social e da xustiza espacial”.
Son 3 os eixes sobre os que debulla as súas inquedanzas:
1. “Velar pola construción social e non especulativa da cidade”
O grupo pide que o documento indique que se “promoverá o uso público dominante dos espazos liberados para evitar a especulación inmobiliaria e os seus efectos de exclusión social”. Para iso considera necesario implementar medidas baseadas no concepto da “cidade dos 15 minutos”, “garantindo o acceso universal e libre da cidadanía a tódolos espazos resultantes do proxecto desde tódolos barrios”.
Piden incluír “corredores ecolóxicos para fortalecer a resiliencia climática e protexer o borde marítimo”, ademais de deseñar un proceso de “participación cidadá real e vinculante, que vaia mais aló da mera consulta, vinculándose directamente coa toma de decisións de forma integral e deliberativa; en audiencias públicas, talleres interactivos e mecanismos avanzados de co-deseño”.
Para iso propón a creación dun “Consello Social do Frente Litoral que brinde unha voz efectiva e autónoma, vinculada ás asociacións veciñais, aos ámbito da pesca e do resto das actividades produtivas do porto xunto coa representación da sociedade civil, académica e profesional da cidade e da súa área de influencia”.
2. Asegurar o dereito á cidade.
Consideran fundamental protexer “o emprego vinculado ás actividades portuarias non molestas nin perigosas”, pero sobre todo, asignar “unha parte dos terreos para vivenda de promoción e titularidade pública en réxime de alugueiro, preferentemente destinada a xoves e maiores, a estudantado universitario e a grupos vulnerables, para actualizar a oferta residencial e alivien a crise habitacional da cidade, universalizando o dereito á vivenda”.
Nese sentido apunta a necesidade de establecer “mecanismos xurídicos claros que garanticen a titularidade pública do solo da área portuaria e a doada reversión de calquera tipo de concesión que neles se puidera dar”.
Apuntan ademais á “potenciación do bordo portuario como interface da conectividade local e supra municipal, ofrecendo a adecuada resposta a unha mobilidade colectiva e sustentable que minimice os actuais conflitos derivados do uso intensivo e persoal do automóbil”.
3. Definir un modelo social de financiamento e gobernanza.
O colectivo pide tamén superar o convenio de 2004, e rexeitar así “modelos de financiamento baseados na venta de espazos ou outros activos públicos para cubrir os custos da operación ou o financiamento do porto exterior”.
Con todo, considera que debería ser “un consorcio público, liderado pola Cidade a través do seu Goberno Municipal e en necesaria cooperación cos demais concellos metropolitanos implicados por esta interacción Porto-Cidade”, e aberto á participación o que lidere este proxecto destinado a mellorar os servizos públicos da cidade.
Máis novas do Coruña Marítima
