Mariscadores e mariscadores da ría do Burgo secundaron este luns unha nova concentración ante a Delegación do Goberno para esixir ao Executivo central e á Xunta axudas mentres non poidan faenar tras as obras de dragado. Denuncian, así mesmo, “abuso de autoridade” por parte do Estado “ignorando” as súas reclamacións.
O colectivo tiña o pasado venres, día 11, convocada unha mesa de negociación entre representantes de ambas as administracións e da Confraría de Pescadores da Coruña para tratar de resolver este problema á cal “non acudiu ninguén do Ministerio de Transición Ecolóxica, nin tampouco comunicaron a súa ausencia nin programaron a reunión para outro día”. Nesa reunión a Xunta deixou claro que ela non vai asumir e que a responsabilidade correspóndelle ao goberno central
“Parécenos un abuso de autoridade que nos ninguneen e non queiran saber nada da problemática que deixou tras de si o dragado da ría do Burgo, tanto pola mala finalización da obra como polo impedimento de traballar ata que o marisco alcance a talla comercial”, resumiu o portavoz destes traballadores, Manuel Baldomir, respecto da actitude do Goberno central.
Así mesmo, criticou que o venres o secretario de Estado de Medio Ambiente, Hugo Morán, realizase unha visita á zona cos alcaldes de Culleredo, José Ramón Rioboo Castro, e de Oleiros, Anxo García Seoane, “ignorando unha vez máis á Confraría” ao non ser convidados o acto, segundo aseguran.
“Isto demóstranos que desde Madrid non gobernan para todos da mesma maneira, deixando de lado ao sector máis vulnerable, os cidadáns que viviamos do mariqueo”, engaden ante unha situación na que se atopan ao redor de 70 familias.
A Xunta deixa en mans do Goberno Central as axudas aos mariscadores do Burgo
