Un bañista foi rescatado da praia de Riazor, na Coruña, ao non poder saír da auga, segundo informa o 112 no seu parte de incidencias. A persoa foi rescatada do mar por varios particulares. Os feitos ocorreron ao redor das 18.20 horas. Foi sobre esa hora cando o 112 recibiu numerosas chamadas de particulares, indicando que se lle sacou da auga e que estaba inconsciente.
Desde este servizo, alertouse a Urxencias Sanitarias de Galicia-061 e a axentes da Policía Nacional e Local. Tamén se informou a Salvamento Marítimo, ao Servizo de Gardacostas de Galicia, Garda Civil e Protección Civil. O persoal sanitario desprazado ao lugar atendeu á persoa e procedeu ao seu traslado ao complexo hospitalario universitario da Coruña (Chuac).
