Emotiva a homenaxe rendida este martes no Teatro Colón a Tono Correa Corredoira. O comprometido artista herculino recibiu un grato recoñecemento da súa cidade, nun evento organizado polo Concello para poñer en valor o seu traballo en prol da cultura.
“Foi unha celebración da vida moi intensa e singular”, explícanos o propio protagonista, satisfeito de ver o “Teatro Rosalía inzadiño, petado, para esta festa da arte!”.
O acto contou cun acompañamento musical e foi presentado por Víctor Barús. Ademais, proxectouse o documental ‘A Caverna dos Soños’, dirixido por Javier Sega, Víctor Barús e Jerl sobre o labor artístico de Correa Corredoira. Tamén participaron o escritor Francisco Fernández Naval e a poeta, escritora e xornalista, Eva Veiga.
Todas as persoas asistentes recibiron unha obra gráfica do propio autor como agasallo.
Correa Corredoira
Tono Correa Corredoira, nado na Coruña en 1952, é un artista galego multidisciplinar recoñecido pola súa traxectoria como pintor, escultor, gravador, ceramista e muralista. Comezou a súa carreira artística nos anos 70, tras abandonar os estudos de Arquitectura e Belas Artes para dedicarse plenamente á creación artística. Foi membro fundador dos colectivos A Galga e GrupOrzán, e participou activamente no movemento Atlántica, clave na renovación da arte galega contemporánea.
A súa obra caracterízase por unha figuración expresionista que aborda temas como a maternidade, o erotismo, os mitos clásicos e o mar. Entre as súas creacións máis emblemáticas destaca o mural ‘27 golfiños e unha estrela’ (1992), situado na praia de Santa Cristina, en Oleiros, realizado en vitrocerámica. Tamén é autor da ‘Rosa dos Ventos’ (1994), o mosaico no parque escultórico da Torre de Hércules.
Correa Corredoira tamén ten desenvolvido unha destacada actividade como ilustrador e poeta, e continúa a ser unha voz activa na defensa do patrimonio artístico e cultural de Galicia.
