Unha patrulla conxunta da Garda Civil da Laracha e Carballo rescatou este domingo, 23 de xuño, a un home de 86 anos que se atopaba desorientado e en situación de risco na súa vivenda unifamiliar de Paiosaco, no concello de Arteixo. A intervención dos axentes produciuse despois de que un familiar, alarmado por non poder contactar con el durante varios días, alertase aos servizos de emerxencia.
O aviso chegou á Garda Civil a través dun familiar que sabía que o home padecía demencia incipiente e que levaba días sen dar sinais de vida. A patrulla que prestaba servizo de seguridade cidadá desprazouse de inmediato á vivenda. Tras diversos intentos fallidos de contacto e ao escoitar voces de auxilio desde o interior, os axentes decidiron actuar con rapidez.
Saltaron a vaia perimetral da casa e, ante a imposibilidade de acceder por portas ou ventás principais, forzaron a xanela dun baño traseiro para entrar no inmoble. No interior atoparon ao ancián tendido boca arriba entre dúas camas, visiblemente desorientado, con fala incoherente e síntomas evidentes de desatención.
SEN MEDICACIÓN DENDE O 20 DE XUÑO
O home, que manifestaba ter moita sede, foi axudado polos axentes a sentarse e a beber auga mentres esperaban os servizos sanitarios. Cando chegou un familiar, comprobouse que non tomara a súa medicación desde o pasado xoves 20 de xuño, o que suxire que podería levar varios días sen atención adecuada.
Foi trasladado de urxencia en ambulancia ao Complexo Hospitalario Universitario da Coruña (CHUAC), onde está a recibir asistencia médica especializada.
Nun comunicado, o Instituto Armado salientou que esta actuación “amosa a importancia da colaboración cidadá e da rápida resposta das forzas de seguridade na protección das persoas maiores e vulnerables”. Tamén fixeron un chamamento á sociedade para prestar atención ás persoas maiores que viven soas, especialmente aquelas que padecen enfermidades cognitivas.
A Garda Civil da Laracha e Carballo mantén activo o seu servizo de seguridade cidadá na comarca de Bergantiños, onde este tipo de intervencións, segundo fontes do corpo, “non son infrecuentes” dada a presenza de poboación envellecida e en situación de illamento social.
