Máis de 115.000 persoas asistiron aos concertos do Festival Noroeste Estrella Galicia, enmarcado nas Festas de María Pita, na Coruña, segundo informa o consistorio e Turismo da cidade. Foi durante os distintos concertos nos escenarios habilitados para tal fin. “Cinco días nos que se celebraron ata 38 concertos, todos eles gratuítos, con nomes como Luar na Lubre, A Yegros, Mondra, P.P Arnold, Guadi Galego, Siloé ou The Vaccines“, remarcan.
Con estes últimos gozaron 28.000 persoas na noite do sábado, mentres que a xornada galega na praia, con Carlos Ares, Luar na Lubre e Grande Amore, xuntou a 30.000 persoas. Lonxe quedan as noites de máis de 80.000 persoas.
A praza de Azcárraga rexistrou case 1.800 persoas de público para os concertos de J.P. Bimeni e Annie and The Caldwells. Albert Pla, con case 10.000 persoas, foi un dos máis exitosos de María Pita, e o Castelo de San Antón rexistrou un cheo total nos tres días nos que a música soou dentro da fortaleza.
Por outra banda, as artes escénicas pecharán de novo outra edición do Festival Noroeste Estrella Galicia, como xa fixeran no pasado ano. Será no parque de Santa Margarita o domingo 17 de agosto, ás 19.30 horas, coas actuacións de Xosé A. Touriñán, David Amor, Javier Veiga, Lucía Veiga, Marita Martínez e Patricia Castrillón nunha nova peza dos ‘Contos ao Noroeste’.
As nosas lecturas do Noroeste
Mondra levou de Ronda á mocidade herculina para Quererse ben
