O Festival Internacional da Banda Deseñada Viñetas desde o Atlántico continúa este sábado, día 16, cunha programación variada que combina charlas, presentacións e firmas con destacados nomes a nivel nacional e internacional, así como un encontro profesional sectorial no Circo de Artesáns.

Pola mañá, está organizada unha charla a cargo de Abel Alves (en colaboración con Demo Editorial). Ás 11.30 horas, o mesmo autor presentará a webserie de animación ‘O búnker’, tamén con Demo Editorial.

A mañá terminará ás 12.30 horas cunha sesión de firmas de distintos autores. Xa pola tarde, ás 17.00 horas, Arkaitz González presentará Astrid! (en colaboración con Fandogamia Editorial), ao que sumarán outras presentacións, ademais dun encontro sectorial.