Nun Obelisco tinguido de negro, centos de persoas berraron ao unísono “Lumes nunca máis”. A historia repítese, pero o pobo galego, máis unha vez, encheu as rúas de moitas vilas e cidades para reclamar unha xestión forestal que teña en conta as necesidades reais do medio rural. A plataforma ‘Por un Monte Galego con Futuro’ convocou este xoves concentracións en 17 municipios de Galicia contra a política forestal do PP.
“Estamos sendo testemuñas de como os lumes se propagan polo noso rural”, afirmaba Cesáreo Sánchez, voceiro da plataforma. Decenas de organizacións, entre as que se atopan Adega, a AC Alexandre Bóveda, a CIG ou o Sindicato Labrego Galego, reuníronse para denunciar “outra traxedia cultural, social e económica”.
Ao berro de “In-com-pe-ten-cia”, os manifestantes alzaron pancartas e carteis cheos de frases como “Lumes nunca máis”, “Non quero lumes nin celulosas nin eucaliptos”, “O negocio queima os montes, PP/SOE alimenta o lume” , insistindo en que “a verdadeira política de prevención consiste nun medio rural vivo”. “Unha vez máis, ten que ser o pobo galego o que sae á rúa para esixir ao goberno da Xunta medidas urxentes para xestionar esta situación, así como un cambio nas súas políticas gandeiras e forestais”, sentenciaban.
Nun acto de solidariedade que se plasmou en numerosas localidades por todo o territorio, a veciñanza volveu insistir na xestión da Xunta de Galicia ante a numerosa onda de incendios que asola o país: “En plena vaga de incendios, o presidente da Xunta da Galiza, o señor Alfonso Rueda, pedía medios ao estado cando tiña 190 prazas sen cubrir”.
“Basta xa de tanta manipulación e de propaganda baleira do noso rural” foi outra das frases que conmocionou aos asistentes. Entre berros e asubíos, A Coruña escoitou dicir alto e claro que o rural “non se vende”.
CONCENTRACIÓNS NO RESTO DAS LOCALIDADES
As consignas de “Rueda dimisión” escoitáronse por todo o territorio. En Vigo, máis de mil persoas manifestáronse para clamar un “xa abonda” aos incendios forestais e para esixir cambios nas políticas forestais da Xunta. Os participantes concentráronse no Farol de Urzáiz e marcharon cara á sede territorial da Xunta, coreando consignas como ‘Non se toca a nosa terra’, ‘Goberne quen goberne, o monte non se vende’, ‘O gasto militar, para investimento no rural’ ou ‘Rueda dimisión‘.
A praza Maior de Ourense encheuse de centos de manifestantes en defensa do monte galego, danado polos incendios que arrasaron a provincia na última semana. Esta é a segunda manifestación en menos dunha semana na cidade termal. Previamente ao seu inicio, algúns dos asistentes admitiron sentirse “decepcionados e avergoñados” coa xestión da Administración autonómica. Tamén, salientaron o “cansazo” de ver “un ano máis” os montes e aldeas arder. “Que un país considerado de primeiro mundo estea así dá bastante pena”, destacou unha das manifestantes.
