A alcaldesa da Coruña, Inés Rey, lamentou a “inacción” da Xunta e reiterou a súa petición de “colaboración” para que elabore un marco xurídico e poder facer efectivas as medidas da zona residencial tensionada. Así o manifestou a preguntas sobre este asunto en rolda de prensa e despois de que o Executivo autonómico asegurase que “a normativa que regula as zonas declaradas tensionadas é estatal, por tanto a regulación para facer efectivas as medidas contempladas tamén é competencia estatal”.

“Necesitamos a concorrencia da Administración autonómica que é a que ten os datos para poder facer efectivas as medidas que se recollen na declaración”, explicou para engadir que se o Goberno municipal non dispón de cifras “é imposible que nós podamos actuar sancionando, regulando ou advertindo aos propietarios”.

En canto ás discrepancias entre ambas as institucións, Rey confesou estar “cansada de polémicas”. “O tema da vivenda ten que estar por enriba de rifas políticas”, indicou. Así, argumentou que a zona de mercado tensionado “non é a solución máxica” pero está incluída nas medidas que están a tomar cada unha das administracións “dentro das súas competencias para tentar reverter a situación”. Así mesmo, pediu á Xunta que “se tome en serio esta medida, unha vez que se declarou que o que hai que facer é colaborar”.

XUNTA

Pola súa banda, o Goberno autonómico sinala que “a responsabilidade de facer cumprir esta normativa é do Goberno central, a Xunta só debe tramitar a documentación relativa á solicitude de declaración de mercado residencial tensionado”. “É rotundamente falso que a lei estatal delegue nas comunidades autónomas o desenvolvemento e aplicación de sancións para que as medidas sexan efectivas como afirma a alcaldesa”, argumenta.