O Consello da Xunta autorizou onte, na súa reunión semanal, o expediente de contratación do servizo de xestión enerxética e mantemento e condución de edificios, instalacións e equipamentos de diversos centros dependentes da área sanitaria da Coruña e Cee por importe de 15.857.999 euros para un período de cinco anos.
“A xestión enerxética nos centros sanitarios permite optimizar o consumo de enerxía, o que resulta nunha redución significativa dos custos operativos”, remarca a Xunta.
Respecto diso, engade que neste tipo de instalacións, o consumo enerxético é elevado debido á operación continua de equipos médicos, sistemas de climatización, iluminación e demais, polo que un servizo de xestión enerxética axuda a identificar e corrixir ineficiencias.
O obxecto do contrato consiste no servizo de xestión enerxética e o mantemento e condución dos edificios, instalacións e equipos dos centros da área sanitaria da Coruña e Cee: Hospital Materno-Infantil; Hospital Marítimo de Oza; Hospital Abente e Lago; Centro de Especialidades do Ventorrillo; Hospital Público de Cee e lavandaría de Agrela.
Así mesmo, quedan incluídos dentro do obxecto do contrato as tarefas relativas á prevención e control da legionelosis, traballos en materia de calidade da auga, xardinaría, limpeza e mantemento da rede de saneamento, mantemento correctivo e asistencia 24 horas dos grupos electrógenos e os centros de transformación e reciclaxe da biomasa.
