Despois dun longo proceso, e a pesar de ter chegado mesmo a un acordo plenario en Culleredo, será o polígono de Morás e non o edificio de La Cros do Burgo, o que reciba o novo centro de investigación do CETIM Technological Centre.
Este centro privado de I+D+i, sen ánimo de lucro, declarado Fundación de Interese Galego pola Xunta de Galicia, debeu cansar de pelexar coa corporación cullerdense e se vai instalar no polígono arteixán.
Unha decisión que para o goberno socialista de Culleredo ten un gran culpable: “O Partido Popular de Culleredo culmina a súa escandalosa operación de sabotaxe ao desenvolvemento da Cros”, denuncia o alcalde José Ramón Riobóo. Para o PSOE cullerdense, “a líder do PP de Culleredo, Izaskun García Gorostizu, torpedeou desde o principio a iniciativa para impedir que levase a cabo nas antigas naves, esgrimindo unha argumentación que agora se constata que se trataba dunha mera escusa electoralista”. E denuncian que “as supostas razóns que o PP de Culleredo utilizou para votar en contra non son de aplicación curiosamente en Arteixo. A fórmula da cesión demanial de terreos non era válida para o PP de Culleredo, pero en cambio si que é válida en Arteixo”.
“Aquí quen perde non é o alcalde, quen perde é Culleredo, e perde moito”, apunta o primeiro edil. En concreto, relata, “perde postos de traballo: os 100 existentes hoxe no CETIM márchanse para Arteixo e os outros 100 de nova xeración no ámbito da ciencia que incluía o proxecto, tamén. Culleredo deixa escapar o desenvolvemento dun motor económico dun dos sete centros tecnolóxicos recoñecidos en Galicia. Non se trata dun proxecto máis, trátase dunha aposta pola economía circular, un ámbito en auxe e que é un foco de innovación prioritario a nivel europeo”.
Mentres en Arteixo celebran, con boa lóxica, a chegada deste centro punteiro, en Culleredo “temos que lamentar a bajeza política do PP, que antepuxo o cálculo partidista ás necesidades dos seus veciños”, critica.
Máis novas sobre o proceso
PP e PSOE sacan adiante no pleno o proceso para a cesión de La Cros a unha entidade
Así sería o Centro Tecnolóxico que Culleredo propón para a Cros do Burgo
