Apenas uns días despois de recoller o recoñecemento de Institucións Penitenciarias, Xosé Manuel Barros volveu coller o grupo de persoas internas no Centro de Inserción Social da Coruña que participan voluntariamente no proxecto Entre Crebas, para ir limpar o areal de Santo Amaro.
Falamos da poderosa iniciativa da Asoc. Mar de Fábula, que promove a reinserción sociolaboral das persoas privadas de liberdade que se atopan cumprindo a última parte da súa condena, convertíndoas en verdadeiros axentes de concienación ambiental.
Tras dous meses sen limpezas neste areal urbano do barrio de Monte Alto (moi usado nestas tardes de calor, ademais), 24 persoas residentes do CIS, acompañadas de 3 exresidentes colaboradores, unha funcionaria deste organismo estatal e 2 voluntarios de Mar de Fábula, durante unha hora e media de traballo, baixo un sol acolledor, déronlle un bo repaso, sempre á vista dos viandantes e da propia policía municipal que pasou por alí co seu coche atraídos pola “movida”.
Unha “movida” ambiental, creativa, de persoas sensibles, de dura vida que sacaron forzas para limpar e coidar o mar, recompoñéndose e reforzándose eles mesmos tamén, apañando os refugallos que ía deixando a marea no seu camiño de baixada, interesándose sobre os tipos e orixes dos residuos e as curiosidades que devolvían as augas entre os argazos. “Foi unha acción enriquecedora, por momentos, unha especie de aula do mar na que non se sabía moi ben quen enseñaba a quen”, relata emocionado o propio Barros.
O resultado da colleita foi duro, de novo, demostrando a cantidade de lixo mariño que provoca o seu humano: 300 cordas e cordeis (nunca apañaran tantas), 12 anacos de nasas, 2 anacos caixas do peixe, 97 envases e botellas de plástico, 120 cabichas, 17 servilletas e anacos de papel, 21 bastonciños de algodón, e 14 anacos de madeira.
Ademais, de propina, curiosidades como un rosario, 2 vapeadores e un pau para xogar ao golf…
En total, 589 anacos de lixo que non volverán ao mar, como as moreas de lixo plástico miúdo e microplásticos que foron directamente en bolsa ao contedor correspondente.
Unha nova demostración do poder social da acción medioambiental.
Máis novas
Xosé Manuel Barros de Mar de Fábula, recoñecido polo CIS Coruña
Cando as persoas privadas de liberdade se convirten en “axentes do cambio”
A praia de Santo Amaro volveu recibir a visita dos salvadores do CIS e Mar de Fábula
Entre Crebas: As persoas do CIS invitan á sociedade a limpar a Praia de Santo Amaro
