O Plan de Mellora de Equipamentos Deportivos nos barrios do Concello da Coruña conta cun investimento de 6,2 millóns de euros na súa primeira fase.
Así o anunciou esta mañá a rexedora Inés Rey, destacando que o Plan inclúe a construción de 6 novas pistas multideporte ao aire libre así como a renovación integral de equipamento en varios distritos da cidade.
6 pistas multideporte
En concreto, estas instalacións estarán situadas en Monte Alto (da que xa falamos a semana pasada arredor do denominado Plan de Barrios 25-27), Adormideras, Barrio das Flores, a Urbanización Breogán e a contorna da Cubela e Lonzas.
Ademais, unha cuarta parte dos fondos correspondentes á primeira fase, un total de 1,5 millóns de euros, permitirán sufragar melloras nos vestiarios da Cidade Deportiva da Torre-Arsenio Iglesias.
As actuacións tamén se estenderán aos sistemas de auga quente do Palacio dos Deportes de Riazor e aos campos de fútbol de Visma. Nestes últimos, o Concello ten previsto destinar máis de medio millón de euros a renovar os tapetes de céspede artificial, previsiblemente no ano 2026.
Outros 269.000 euros permitirán mellorar os sistemas de auga quente no campo de fútbol da Leyma e, a maiores, o Concello estima en 275.000 euros o investimento necesario para adecuar e mellorar o campo de xogo das vivendas Virxe do Carme, en Labañou.
DEMANDAS DO PERSOAL
A preguntas dos xornalistas sobre as mobilizacións convocadas polo persoal de escolas deportivas municipais, xestionadas pola empresa Serviplus, para reclamar unhas condicións de traballo “dignas” e de “mellora” do servizo, a rexedora asegurou que o goberno local é “perfectamente consciente” das súas reclamacións.
“O propio concelleiro — en alusión ao titular de Deportes — mantivo reunións permanentes con eles”, asegurou para incidir en que “moitas das súas peticións e demandas serán tidas en conta no prego no que se está traballando desde a área e que proximamente sairá”.
