O CEIP Alborada, na segunda fase do polígono de Elviña, acolle a primeira noite de peche do profesorado no marco da folga do ensino público convocada pola CIG-Ensino para estas 48 horas de 28 e 29 de outubro. Unha folga que se materializa con peches reivindicativos en 6 centros de ensino de outras tantas cidades galegas.
Falamos dun acto reivindicativo, que viña sen facerse dende 2013, cando o profesorado se pechou en contra da LOMCE, o que dá idea da dimensión da situación actual, na que os sindicatos volven convocar folgas e peches para pedir á Consellería se sente a negociar as demandas de toda a comunidade educativa ante un servizo público que esmorece ante os recortes da Consellería.
Se ben a Xunta cuantifica nun 30% o seguemento desta segunda folga no que vai de curso por parte do profesorado, mentres que o sindicato convocante destacou o “importante seguimento de profesorado”, á espera de que se contrasten os datos de participación a partir do vindeiro xoves. Ademais, destacaron que a asistencia á manifestación da mañá desenvolta en Compostela volveu superar todas as previsións a pesar da choiva.
“Lección de dignidade e de unidade”
Para o sindicato a manifestación (con cabazas) e as protestas en cada unha das Delegacións Territorias demostran unha “lección de dignidade e de unidade” dos profesionais do ensino público.
”Trouxémoslle cabazas ao conselleiro porque simboliza o suspenso por parte do profesorado porque non sabe sumar cando di que medio docente máis medio docente son dous docentes, suspende tamén na atención á diversidade ao pretender que unha persoa orientadora atenda a máis de 300 rapaces ou rapazas ou non dota os centros con especialistas de Pedagoxía Terapéutica e Audición e Linguaxe, cando non sabe colocar no mapa os coles do rural porque os deixa abandonados ou en lingua galega por someter ao ostracismo á nosa lingua”, sinlaou Laura Arroxo, secretaria nacional da CIG-Ensino.
Arroxo tamén criticou o anuncio de Román Rodríguez sobre as 1.500 prazas das oposicións o ano que vén aludindo a que se trata de cubrir a taxa de resposición, é dicir, de substituír as persoas que se xubilan por novo funcionariado de carreira sen que isto signifique ningún incremento sobre o número de profesorado actual. “No proxecto de orzamentos para o vindeiro curso mantense un ano máis o número de profesorado a mesma cifra, 30.424 que nos últimos 5 anos e as partidas para educación soben moi por debaixo da media do que soben outras Consellarías”, concluíu.
Mañá, nova xornada de folga, novas protestas
Este mércores as protestas deslocalízanse ás catro capitais de provincia para visibilizar o conflito con manifestacións que chegarán até as Delegacións Territoriais da Coruña. A manifestación herculina sairá do propio centro Alborada ás 11:30h, como as outras 4 capitais de provincia.
Peticións da CIG
- Baixada de ratios no inicio de todas as etapas educativas a partir do vindeiro curso 26/27.
- Recuperación do horario lectivo recortado en 2011 (21 horas en primaria e infantil) e en 2012 (18 horas no resto de ensinanzas) tamén a partir do vindeiro curso e fin da discriminación horaria nos CIFP e centros de ensinanzas artísticas. “Galiza é a única comunidade de todo o Estado que permanece coas 20 horas en secundaria e outras ensinanzas”, lembran.
- Medidas concretas que garantan unha correcta atención á diversidade (criterios para a dotación de persoal especialista de PT e AL, incremento do número de orientadores/as nos centros, cómputo como dobre ou triplo do alumnado con necesidades en todas as etapas, autorización de desdobres, PDCs e FP básica en todo o territorio…)
- Un plan real de eliminación de burocracia que leve aparellado, entre outras medidas, un incremento da dedicación horaria para equipos directivos, coordinacións e titorías.
- Melloras retributivas: incremento retributivo lineal para todo o profesorado no complemento autonómico que permita recuperar o poder adquisitivo perdido, recuperación do cobro do verán para o persoal substituto que traballe 5 meses e medio e equiparación salarial do PESSFP co resto de profesorado de FP.
- Redución da xornada laboral a partir dos 55 anos e recuperación das licenzas por formación retribuídas.
Máis novas do ensino
As familias de Oleiros simbolizaron cunha marcha fúnebre o enterro do ensino público de calidade
