Interesante e necesario o Seminario Anual ‘Garantía de Dereitos e Novos Modelos de Servizos Sociais’ organizado pola Rede Europea de Loita contra a Pobreza e a Exclusión Social no Estado Español (EAPN-ES) (e EAPN Galicia), desenvolto estes 26, 27 e 28 de novembro en diferentes puntos da Coruña.
Entodades de todo o estado participaron neste evento de referencia na análise e proposta de políticas públicas desde a experiencia das organizacións sociais, que nesta edición tiña por obxectivo analizar os servizos sociais e a súa diversidade territorial. “A pobreza non é inevitale” foi un dos claros discursos botados durante a semana.
Neste sentido, EAPN-ES apelou a impulsar un modelo de servizos sociais máis áxil e flexible, que permita unha maior adaptación ás diferentes necesidades sociais, que poña o foco na prevención e nas persoas en situacións máis vulnerables, baseado nun sistema de coordinación territorial máis eficaz.
A rotura da cohesión social conseguida no estado dende a transición e a necesidade de establecer un traballo dende a base foron algunhas das cuestións analizadas neste exercicio para repensar e redefinir as funcións do Terceiro Sector e dos servizos sociais, coa necesidade de afrontar as problemáticas xeradas nesta.
Por aí, incidiuse na necesidade de traballar a pé de rúa, “construíndo comunidade” e comunidades a nivel local, como único camiño para loitar contra o discurso do odio, nese sentido puxeron o foco na ultradereita, con nomes e apelidos, como están desprestixiando e desmoronando as ideas do estado de benestar inseridas durante tantas décadas en todas as ramas da sociedade.
O evento contou con especialistas de todo o estado, nomeadamente Cataluña, e A Coruña, escollida non só como anfitriona senón tamén como exemplo de boas prácticas.
Ademais, desde a Rede pediron que o proceso de renovación conte coa experiencia e as achegas das persoas en pobreza, e suman, entre outras propostas, a urxencia de mellorar o ingreso mínimo vital para facelo máis accesible e harmonizalo coas rendas autonómicas, así como apostar por unha prestación universal por crianza que garanta os dereitos e oportunidades ás familias con nenos nenas e adolescentes.
A Coruña e Galicia como exemplo
O presente Seminario chega un mes despois da presentación do XV Informe ‘O Estado da Pobreza. Pobreza e territorio. Comunidades Autónomas e Unión Europea’, que analizaba os indicadores de pobreza e exclusión social nas Comunidades Autónomas e en Europa. Entre as principais conclusións, EAPN-ES destaca a necesidade de mellorar as axudas e prestacións autonómicas, como unha das claves para previr a pobreza e a desigualdade territorial.
No caso de Galicia, segundo o estudo, o estado do benestar evitou que 760.000 persoas entrasen en pobreza en 2024: de non existir ningunha axuda nin prestación, incluídas as pensións, a pobreza chegaría a 1.144.000 galegos e galegas. De feito, a rexión é unha das comunidades autónoma onde máis melloraron as cifras de pobreza.
A esta situación fixo referencia na súa intervención na sesión inaugural a presidenta de EAPN Galicia, Ana Pardo, asegurando que “cando hai vontade política e responsabilidade compartida, lógrase avanzar”, e lembrou a elección da Coruña para a celebración do Seminario por ser “a cidade que máis orzamento dedica ao investimento social”.
A pesar da mellora, o Informe de EAPN-ES evidenciou que as cifras se manteñen aínda altas e constantes na rexión, con máis de medio millón de persoas en situación de pobreza, polo que desde EAPN Galicia avogan por políticas públicas ambiciosas como a modificación da Lei de Inclusión Social para facilitar o acceso á RISGA e a súa complementariedade co IMV, mentres non sexa transferida ao goberno autonómico, o apoio ás familias monoparentais —máis de 35.000 na pobreza—acatando por fin a Lei de Impulso Demográfico, e garantir programas integrais de inclusión sociolaboral para quen poida traballar. Sen esquecerse de asegurar o mantemento de vivenda destinadas a persoas en vulnerabilidade.
Máis novas
Os Servizos Sociais da Coruña para as persoas sen fogar, un mar de segundas oportunidades
O Centro de Baixa Esixencia de Labañou cumple un ano: “Un espazo de dignidade dentro da cidade”
