Non puideron celebrarse os Encontros Internacionais Acampa pola Paz este ano por mor da rebaixa da axuda do goberno municipal, pero a rede de solidariedade non quere deixar orfos os seus premios de recoñecemento á defensa dos Dereitos Humanos.
Uns premios decididos por votación popular, que foron escollidos aló polo mes de abril, e que queren recoñecer ao pesoal médico e sanitario que traballa en Gaza, así como a Mohamed Safa, o oftalmólogo e activista palestino aficando dende hai máis de 30 anos en Galicia.
O acto de entrega terá lugar ás 11.45 horas na sede da ONCE, no Cantón Grande, unha cita á que Acampa convida a toda a cidadanía coruñesa para facer soar este aplauso colectivo.
Conseguir traer a alguén que representase ao colectivo sanitario que leva dous anos no inferno de Gaza non foi doado. Pero a Rede conseguiuno e vai entregar a peza escultórica de Pilar Subías, de xeito simbólico ao anestesista e intensivista Dr. Refaat Alathamna, recentemente chegado desde Gaza a Madrid coa súa familia hai poucos días. A través das redes sociais, o Dr. Alathamna narrou en directo ao mundo o que alí acontecía, como salvaron vidas en condicións inimaxinables e como buscou desesperadamente comida para alimentar á súa muller e aos seus cinco fillos, hoxe xa seis co recente nacemento de Aaser, que chegou ao mundo en Xordania aos catro días de ser evacuados. A súa chegada a España foi posible pola intermediación, entre outros, do cineasta Javier Fesser, que lle acompañará neste acto de entrega.
Na Categoría Galicia, o Recoñecemento Acampa 2025 será para Mohamed Safa, o oftalmólogo cisxordano afincado desde hai décadas en Costa da Morte, unha voz solvente polo seu activismo e compromiso na defensa dos dereitos do pobo palestino e o traballo na difusión da dura realidade na que habitan desde hai décadas.
Safa acaba de publicar un novo libro, “Gaza, un xenocidio en directo” [Ed. Medulia], e pronto coñeceremos a primeira presentación que se realizará na cidade.
Máis novas
Os recoñecementos á Defensa dos DDHH da Rede Acampa pola Paz terán cores palestinas
