Repsol e a Autoridade Portuaria da Coruña asinaron un acordo para completar o traslado dos tráficos actuais da compañía ao Porto Exterior, en Arteixo, e que permitirá a “liberalización” en 2027 da dársena interior da cidade.
Así se expuxo no acto institucional presidido polo presidente de Repsol, Antonio Brufau, e o da Autoridade Portuaria da Coruña, Martín Fernández Prado. No mesmo, ambos subliñaron a importancia desta infraestrutura para a “competitividade e a economía” da comunidade galega, pero non se falou da posible venda de solo do peirao de San Diego para a especulación inmobiliaria.
“Consolida un dos principais polos industriais de Galicia e, ademais, dános garantía de subministración, que hoxe en día non é pouco, cunha empresa líder mundial”, indicou Fernández Prado.
Nel, o presidente da Xunta, Alfonso Rueda, recalcou que con este pacto as diferentes administracións foron “capaces de pechar un ciclo moi prometedor para conseguir moitísimas cousas a partir de agora”. “As industrias, con respecto e cumprindo a normativa, son o futuro dos territorios”, indicou.
Fíxoo na mesma liña que Brufau, quen, na súa intervención, incidiu en que “sen industria non hai futuro e sen desenvolvemento industrial outras moitas cousas non funcionan”.
RENOVACIÓN URBANA
Pola súa banda, o secretario de Estado de Transportes e Mobilidade sustentable, José Antonio Santano, sinalou que “empeza a facerse realidade un soño da cidade que fai compatible a renovación urbana, co crecemento económico, coa garantía enerxética e co emprego”.
Á súa vez, a alcaldesa da Coruña, Inés Rey, apuntou que con esta firma “acórdase a liberalización da terminal petroleira dos peiraos interiores na cidade en 2027”. Mentres, o rexedor de Arteixo, Carlos Calvelo, dixo que o porto do seu municipio converteuse en “unha realidade industrial de primeiro nivel”, cun “crecemento innegable” e un “polo de referencia nos investimentos relacionados coa enerxía e coa industria”.
Do proxecto, Natalia Barreiro, directora do Complexo Industrial de Repsol na Coruña, aseverou que este acordo permitirá desenvolver “toda a súa actividade portuaria” na nova dársena de Punta Langosteira. Para iso, concretou, a compañía investirá máis de 140 millóns de euros na segunda fase do traslado. En total, destinará “máis de 260 millóns”, lembrou.
Máis novas
Garante o protocolo da Fachada Marítima a titularidade pública do terreos portuarios de San Diego?
