Coa concesión caducada dende 2019, a Planta de Nostián segue operando agravando unha problemática laboral e de medios tremendamente preocupante, provocada pola falta de investimentos e a devaluación dos soldos xerada por esa situación de traballar 5 anos co contrato en precario. 5 anos de convenio caducado, cunha grave folga do lixo polo medio, e un proceso de negociación onde non sabe de que parte está cada quen que recibiu duras críticas do sector medioambiental pola “falta de transparencia”.
Tralos anuncios realizados a comezos de ano de que ía estar licitada antes do remate do ano, parece que a cousa está encamiñada. Así se deduce da reunión da Comisión Especial sobre a planta de Nostián realizada esta mañá no salón vermello do Pazo de María Pita: o Goberno Local informou de que os trámites para a licitación da nova planta están xa moi avanzados e que sairá a concurso ou antes do 31 de decembro ou nos primeiros días de xaneiro.
O BNG, o primeiro en facer valoracións, celebra a licitación “dun servizo básico que debe contribuír para que Nostián sexa unha verdadeira planta de reciclaxe, conforme a un modelo de xestión do lixo baseado nos obxectivos de redución, reciclaxe e reutilización”, afirma Francisco Jorquera.
En realidade falamos un proxecto fundalmental para a cidade e para toda a comarca, que malia ter sempre a sombra da incineración sobre a súa cabeza, “é un proxecto importante para toda o país, porque é diferente ao modelo SOGAMA, que se basea na incineración”, como describen os colectivos medioambientais.
