O deputado do BNG no Congreso Néstor Rego rexistrou iniciativas para reclamar ao Goberno central medidas urxentes para garantir a plena operatividade nocturna do Aeroporto de Alvedro.

Faino, informa, “tras contrastar a grave falta de persoal na Torre de Control tras a súa privatización” e reclama ao Goberno “que a devolva a mans públicas”.

O deputado do BNG no Congreso, Néstor Rego, denuncia que “a xestión privatizada das torres de control de Alvedro e Peinador está a mostrarse absolutamente ineficaz e perigosa ao non garantir persoal suficiente para cubrir quendas de noite ou situacións extraordinarias”.

A concesionaria Saerco, responsable da Torre de Control do Aeroporto da Coruña, engade, “non conta co persoal necesario para garantir a cobertura continua do servizo, o que provoca a cancelación de vacacións, permisos e descansos do persoal, así como a non cobertura de ausencias”.