Volveu demostrar a súa solidariedade a sociedade da Coruña que encheu de doazóns a Casa dos Xoguetes, ese espazo que permite darlle unha nova vida a milleiros de xogos, que sobran nunhas casas e faltan noutras.
Foron un total de 10.112 xoguetes os que se recolleron dende comezos de decembro, tendo que poñer o cartel de “pechado” na última semana no espazo habilitado na Oficina Municipal de Información ao Consumidor (OMIC) (Costa da Palloza, 8, en Catro Camiños).
Este exercicio de “economía circular na cidade”, xa entregou 8.837 xoguetes no punto de recollida e distribución, e quedaron reservadas 1.275 unidades para a súa inminente doazón a entidades benéficas (que se completará durante esta primeira quincena de xaneiro).
Ademais da actividade de recollida e repartición de xoguetes, a sede tamén acolleu, o pasado 3 de xaneiro, varios obradoiros infantís gratuítos, lúdicos e divulgativos, como o de xardinería sostible ou a actuación dun contacontos. Ao longo da xornada, participaron 117
nenos e nenas nas distintas actividades.
