Dous incendios en vehículos durante as primeiras horas deste luns na Coruña deixaron danos materiais e longas retencións, nun dos casos, na Avenida Alfonso Molina, principal vía de entrada a cidade. A primeira producíase ao redor das 6.45 horas na rúa Gregorio Hernández. Os bombeiros informaron de que un turismo — un Mercedes, máis concretamente — ardía “con moita intensidade e virulencia” e con afección a un colector situado preto e á fachada de dous edificios.

Ao lugar desprazouse unha dotación con dous vehículos e sete bombeiros. Unha vez extinguido o lume, o equipo queda pendente de que o guindastre retire o vehículo para poder limpar a zona peonil e parte da calzada.

O outro foco rexistrouse pouco antes das 8.00 horas na Avenida Alfonso Molina. Os bombeiros destacan que para a extinción deste lume necesitaron 2.000 litros de auga. O suceso, ocorrido poucos minutos antes da hora punta no principal acceso á cidade, provocou longas retencións — o lume e as tarefas de extinción obrigaron a cortar a circulación do carril afectado –.