O PSdeG reclamará no Parlamento de Galicia “condicións dignas” para a liña de autobús entre A Coruña e Ferrol tras denunciar o parlamentario Aitor Bouza que “nos últimos días, usuarios e usuarias” do transporte público por estrada “quedaron tirados nas propias estacións”. “Desde o Partido Socialista non imos quedar calados ante esta situación que se produce, que por desgraza non é a primeira vez que ocorre”, sinala o deputado, que avanzou que rexistrarán “de forma inmediata iniciativas no Parlamento galego para esixirlle á Xunta que poña medidas encima da mesa”.

Bouza apunta que isto non só se produce nas propias cidades da Coruña e Ferrol, senón tamén nas paradas intermedias. “Cando chega o bus ao lugar onde está a parada, ao estar cheo, non pode subir ninguén, ou directamente noutros casos xa nin pasa o propio bus, porque vai de forma directa ao estar absolutamente cheo”, lamenta. O parlamentario socialista denuncia que non se pon complementos nin buses de reforzo e avanza que a súa formación esixirá “de forma inmediata” ao Goberno da Xunta que aplique todos os mecanismos que teña á súa man para corrixir esta situación e que non volva ocorrer”.

“Se teñen que establecer un plan de reforzo, que o fagan, se teñen que facer inspeccións para que non volva ocorrer, que as fagan”, insiste Bouza, que pide que se garanta que o servizo interurbano entre A Coruña e Ferrol cumpra con eses criterios de regularidade, de fiabilidade e tamén de accesibilidade. Por último, esixirán tamén que a Xunta “dea contas a través dun informe de cales son as causas que provocan estas deficiencias” e preguntarán se se adoptou algunha medida correctiva e tamén sancionadora contra a empresa que leva a cabo o servizo.